“Роднае слова” ў красавіку
Красавіцкі нумар “Роднага слова” адметны матэрыяламі спецыяльнага раздзела “На падмурку слоў песняровых”, прысвечанага 80-годдзю з дня заснавання Дзяржаўнага літаратурнага музея Янкі Купалы. Зусім не выпадкова яго галоўнай гераіняй стала Уладзіслава Францаўна Луцэвіч – жонка паэта і заснавальніца музея. Гісторыя яе асабістага служэння памяці песняра з шанаваннем узнаўляецца ў публікацыях сучаснага пакалення музейцаў-купалаўцаў.
Адкрывае раздзел эксклюзіўнае інтэрв’ю з унучатай пляменніцай народнага паэта, выхаванкі цёці Уладзі і шматгадовай дырэктаркі музея Жанны Казіміраўны Дапкюнас. Чытачы змогуць не толькі прачытаць яе каштоўныя мемуарныя сведчанні, але і паслухаць аўдыяфрагменты гутаркі.
Гісторыя стварэння Купалаўскага музея і яго філіялаў, сучасная дзейнасць, самая поўная калекцыя сяброўскіх шаржаў на Янку Купалу, генеалагічныя росшукі, звязаныя з яго сям’ёй, – тэмы іншых матэрыялаў спецыяльнага раздзела.
Тэматычны блок артыкулаў, прысвечаных паэтам Паўлюку Трусу і Адаму Русаку, нагадваюць пра юбілейныя даты беларускіх паэтаў.
Толькі ў “Родным слове” – гісторыя шэкспіраўскага “Гамлета” па-беларуску з нагоды 460-годдзя вялікага драматурга. Упершыню ў фокус даследчыцкай увагі навукоўца М. Труса трапляе рукапіс перакладу твора, які ніколі не друкаваўся.
Да ўвагі педагогаў – публікацыі штомесячнай рубрыкі “Функцыянальная адукаванасць: тэорыя і практыка”, якая выходзіць пры падтрымцы Акадэміі адукацыі. Юбілярам красавіка прысвечаны іншыя матэрыялы раздзела “Методыка і вопыт”: “Уладзімір Конан, Паўлюк Трус, Адам Русак і Мікола Хведаровіч: жыццёвы і творчы шлях: Інтэлектуальная гульня (Х–ХІ класы)” Л. Бязручкі і “Папулярызацыя творчай спадчыны Станіслава Манюшкі ў школе: Да 205-й гадавіны з дня нараджэння кампазітара” А. Лойкі-Мічуды.
Анансуем яшчэ адзін эксклюзіўны артыкул нумара, які аспрэчвае агульнапрынятыя ў навуцы звесткі пра паходжанне аднаго з найбольш значных помнікаў старажытнабеларускага мастацтва – Укрыжавання з Галубічаў са збору Нацыянальнага мастацкага музея Рэспублікі Беларусь. Чытаце публікацыю вядучага навуковага супрацоўніка музея С. Чавуса ў нашым “Арт-лекторыі”.
Гадавы часопісны праект “100 партрэтаў Васіля Быкава” працягваецца аповедам пра творы мастака Юрыя Ракшы. Як заўсёды, выявы суправаджаюцца qr-кодам, што значна пашырае магчымасць выкарыстання матэрыялаў праекта ў вучэбна-выхаваўчым працэсе.
