1 сакавіка 2024 г. у Мінскай гарадской ратушы адбылася прэзентацыя спецыяльнага нумара “БГЧ” (№ 12/2023) “Музей гісторыі горада Мінска”.
Яна прайшла напярэдадні даты першай летапіснай згадкі пра горад у сувязі з бітвай на Нямізе. У мерапрыемстве ўдзельнічалі супрацоўнікі музеяў г. Мінска, студэнты гістарычнага факультэта БДПУ, удзельнікі студэнцкай навукова-даследчай лабараторыі “Кліа”, вучні СШ № 173 і СШ № 223 імя Іона Солтыса.
Мадэратарам выступіў галоўны рэдактар часопіса Аляксандр Корзюк. Ён адзначыў важнасць знаёмства з адметнасцямі арганізацыі навуковай, фондавай і музейнай дзейнасці маладога і апантанага калектыву прафесіяналаў па захаванні і папулярызацыі матэрыяльнай і духоўнай спадчыны горада.
Дырэктар музея Галіна Ладзісава паведаміла, што музей гісторыі горада Мінска – самы малады дзяржаўны музей сталіцы, у 2020 г. адзначыў першыя дзесяць год сваёй працы. Стратэгія яго развіцця арыентавана на сучасныя метады і падыходы па ўсіх напрамках музейнай дзейнасці.
Аўтары артыкулаў – Лідзія Марковіч, Юлія Кавалёва, Аксана Жукава і Яўгенія Стальмахова – прадставілі свае публікацыі аб экспазіцыях музея ў кантэксце гісторыі, культуры, архітэктуры, грамадскага жыцця горада Мінска.
Чытачы і прыхільнікі “Беларускага гістарычнага часопіса” высока ацанілі працу калектываў рэдакцыі і музея па прэзентацыі гісторыка-культурнай спадчыны нашага горада і выказалі пажаданні па далейшаму супрацоўніцтву.
