Прэзентацыя тэматычнага нумара «Беларускага гістарычнага часопіса» да 130-годдзя з дня нараджэння народнага пісьменніка БССР К. Крапівы

10 красавіка 2026 г. у Цэнтральнай навуковай бібліятэцы імя Якуба Коласа НАН  Беларусі адбылася прэзентацыя «Беларускага гістарычнага часопіса» (№ 3/2026). Асноўнай тэмай унікальнага выдання стаў юбілей класіка беларускай літаратуры, навукоўца, грамадскага дзеяча Кандрата Крапівы. У змесце прадстаўленых артыкулаў удала спалучаецца гісторыка-літаратурны аналіз творчасці пісьменніка і досвед асэнсавання яго спадчыны ў адукацным працэсе і сродкамі музейнай педагогікі.

Часопіс ілюстраваны ўнікальнымі фота з архіва сям'і К. Крапівы, фондаў Беларускага дзяржаўнага архіва кінафотафонадакументаў і ЦНБ, многія з якіх публікуюцца ўпершыню.

У мерапрыемстве прынялі ўдзел студэнты і выкладчыкі БДПУ імя Максіма Танка, БДТУ, Мінскага дзяржаўнага каледжа мантажных тэхналогій і транспартнай лагістыкі, навуковыя супрацоўнікі ЦНБ, Інстытута гісторыі і Інстытута літаратуразнаўства імя Янкі Купалы НАН Беларусі, настаўнікі школ г. Мінска у агульнай колькасці больш за 40 чалавек. З прывітальным словам да ўдзельнікаў прэзентацыі звярнуўся дырэктар бібліятэкі кандыдат гістарычных навук, дацэнт С.С. Юрэцкі. Мадэратарам сустрэчы выступіў галоўны рэдактар “БГЧ” А.А. Корзюк.

Перад удзельнікамі мерапрыемства выступілі аўтары артыкулаў часопіса – А.П. Дзенісенка, П.М. Мытнік, Т.М. Пагоня. З велізарнай увагай і асаблівымі пачуццямі ўдзельнікі прэзентацыі слухалі ўнучку народнага пісьменніка, загадчыка кафедры дызайну моды факультэта сацыякультурных камунікацый БДУ Алену Ігараўну Атраховіч.

Тэматыку спецыяльнага нумара дапоўнілі паведамленні намесніка галоўнага рэдактара “БГЧ” Н.У. Матусевіч, намесніка дырэктара Беларускага дзяржаўнага музея народнай архітэктуры і побыту Я.І. Мікулы, начальніка аддзела ідэалагічнай і выхаваўчай работы БДПУ І.А. Шарко.

Прэзентацыя завершылася экскурсіяй па выставе да юбілею К. Крапівы.

Шчыра дзякуем кіраўніцтву і супрацоўнікам ЦНБ НАН Беларусі і усім удзельнікам мерапрыемства за цёплую і плённую сустрэчу!

Фота: аддзел маркетынгавых камунікацый ЦНБ.