“Пакуль ты ёсць – працяг наш будзе віцца”: часопіс “Роднае слова” прэзентаваў праекты, прымеркаваныя да Года беларускай жанчыны
На мінулым тыдні рэдакцыя часопіса “Роднага слова” шырока прэзентавала грамадскасці сёлетнія праекты, многія з якіх ажыццяўляюцца ў кантэксце галоўнай тэмы 2026-га, абвешчанага Годам беларускай жанчыны.
У Дзяржаўным музеі гісторыі беларускай літаратуры адбылося прэзентацыйнае мерапрыемства «Вясновыя перазовы: жанчыны-творцы на старонках сакавіцкага нумара “Роднага слова”», якое ладзілася ў межах музейнага праекта “Літаратурная брама XXI стагоддзя”. Яго ўдзельнікамі сталі аўтары сакавіцкага нумара – даследчыкі Мікола Трус, Міхал Бараноўскі, Ірына Шматкова, Алесь Бараноўскі, Алена Марозава. Музейныя ўстановы, з якімі “Роднае слова” яднаюць супольныя асветніцкія ініцыятывы, прадставілі намеснік дырэктара Нацыянальнага цэнтра сучасных мастацтваў Алеся Іназемцава і загадчык навукова-метадычнага аддзела Нацыянальнага мастацкага музея Настасся Трафімчык.
Мерапрыемства прайшло ў атмасферы суладнасці музаў: свае вершы чыталі гераіні сакавіцкага нумара Ірына Багдановіч і Людка Сільнова, гучала вясновая музыка ў выкананні ансамбля флейтыстаў “Флюід”, дэманстраваліся мастацкія творы з часопісных публікацый, а таксама літаратурна-мастацкая экспазіцыя “Мелодыя жаночай душы” з калекцый Дзяржаўнага музея гісторыі беларускай літаратуры.
Незвычайным для навуковага СМІ фарматам правядзення здзівіла гасцей святочная прэзентацыя мастацка-асветніцкіх праектаў часопіса “Роднае слова”, якая адбылася ў Нацыянальным мастацкім музеі Рэспублікі Беларусь. Падчас мерапрыемства ішла гаворка пра сумесныя ініцыятывы, што ажыццяўляюцца ў кожным нумары навуковага і метадычнага выдання і набліжаюць да спасціжэння жаночай мудрасці, таленту і прыгажосці праз мастацтва.
Праект “Пакуль ты ёсць – працяг наш будзе віцца: Цэнтр даследаванняў беларускай культуры, мовы і літаратуры НАН Беларусі да Года беларускай жанчыны”, прэм’ера якога адбылася ў сакавіцкім выпуску “Роднага слова” і была прысвечана сучаснай жаночай паэзіі, прадставіла дырэктар установы, доктар мастацтвазнаўства Вольга Папко.
Нацыянальны цэнтр сучасных мастацтваў Рэспублікі Беларусь выступае на старонках часопіса з праектам “Лучнасць музаў: літаратурная спадчына і выяўленчае мастацтва”. Падчас мерапрыемства экспанаваўся твор, які належыць да залатога фонду гэтай установы і захоўвае вобраз адной з самых нязломных беларусак ХХ ст.: жывапісны партрэт Арыядны Казей, створаны мастачкай Лідзіяй Эрлер. Пра яго расказаў галоўны захавальнік цэнтра і аўтар публікацыі ў лютаўскім нумары “Роднага слова” Алег Ладзісаў.
Тэму жыццесцвярджальнай жаночай творчасці працягнуў паказ калекцыі строяў “Беларуская маляванка” (аўтар Ірына Князева). Яе прадэманстравалі ўдзельнікі мадэльнай студыі “Рэальны ўзрост”, якім гледачы наладзілі сапраўдныя авацыі.
Супрацоўніцтва часопіса з Нацыянальным мастацкім музеем Рэспублікі Беларусь сёлета працягвае штомесячная рубрыка “Архітэктурная спадчына”, якая набыла выразны водсвет жаночай творчасці, а таксама “Арт-лекторый”, аўтары якога часта звяртаюцца да жаночых вобразаў у нацыянальным мастацтве. Плённасць такога ўзаемадзеяння адзначыла загадчык навукова-метадычнага аддзела Нацыянальнага мастацкага музея і нязменны куратар сумесных праектаў музея і часопіса Настасся Трафімчык.
Запамінальнай часткай прэзентацыі стала праграма “Музычнай капэлы” Цэнтра даследаванняў беларускай культуры, мовы і літаратуры НАН Беларусі, падчас якой гучалі народныя вяснянкі і песні беларускіх кампазітараў, а на экране “ажывалі” вобразы выцінанак.
ул. Буденного, 21
