Уладзiмiр Лiпскi: майстар-клас у дзіцячай бібліятэцы iмя Васiля Віткі

17 лiстапада пісьменнік Уладзімір Ліпскі пабываў на сустрэчы з юнымі чытачамі ў сталічнай дзіцячай бібліятэцы № 6 імя Васіля Віткі.

Сваімі ўражаннямі падзяліліся супрацоўнікі бібліятэкі на старонцы УКантакце.

«Я ТУТ ЖЫВУ...»

І зноў свята ў нашай дзіцячай безжурботнай бібліятэцы Віткі.

Да нас прыйшоў дарагі госць: лаўрэат шматлікіх літаратурных прэмій, вялікі сябар дзятвы —  Уладзімір Сцяпанавіч Ліпскі.

Мы рады і шчаслівыя гэтай сустрэчы, рады і чытачы — трэцякласнікі 60-й сталічнай школы, якія слухалі знакамітага пісьменніка, адкрыўшы рты.

Уладзімір Сцяпанавіч распавёў пра сваё дзяцінства, якое вельмі адрознівалася ад шчаслівага і ціхамірнага дзяцінства сённяшніх школьнікаў, распавёў, якім насычаным жыццём жыве цяпер, на парозе свайго 82-годдзя.

Што было самым цікавым і захапляльным? Пісьменнік даваў майстар-клас па напісанні казак. «Уявіце сабе, што вы сядзіце на крэсле (у бібліятэцы) і пры гэтым ляціце ў космас! А цяпер перанясемся да сябе ў кватэру і прадставім сябе на дыване (падушцы, стале, камодзе). Куды мы захочам адправіцца?»

Простыя пытанні будзяць палёт фантазіі ў маленькай свядомасці.

Вось такія сустрэчы застаюцца ў памяці дзіцяці на ўсё жыццё. І толькі чалавек, які па-сапраўднаму любіць дзяцей, можа заслужыць давер і любоў маленькага чалавека.