Па-над Мінскам — «Згукі мінуўшчыны»

Першы адкрыты конкурс беларускага народнага спеўнага і музычна-інструментальнага выканальніцтва «Згукі мінуўшчыны» на базе сярэдняй школы № 1 праводзіўся ў рамках раённай праграмы «Традыцыйная культура і моладзь». Заснавальнікі і арганізатары конкурсу: упраўленне адукацыі адміністрацыі Кастрычніцкага раёна г. Мінска, кафедра этналогіі і фальклору Беларускага дзяржаўнага ўніверсітэта культуры і мастацтваў, грамадскае аб’яднанне «Беларускі фонд культуры» і ЦДАДіМ «Ветразь». Аўтар ідэі і канцэпцыі — навуковы і мастацкі кіраўнік праекта Мікалай Козенка.

Статус адкрытага даў магчымасць прыняць удзел у конкурсе выхаванцам дзіцячых садкоў, падлёткам і моладзі не толькі з Кастрычніцкага раёна г. Мінска, але і гасцям з рэгіёнаў Беларусі.

Салісты, спеўныя і музычныя ансамблі, інструментальныя капэлы ўстаноў адукацыі і культуры прадставілі на суд журы творы беларускай народнай спадчыны. Спевакі дэманстравалі ўзровень выканальніцкага майстэрства ў намінацыях «Ансамблевыя спевы» (асобна для дзяўчат і для хлопцаў), «Ансамблевыя спевы» (мяшаны склад) і «Сольныя спевы». Музыкі змагаліся за перамогу ў намінацыях «Ансамблевае выканальніцтва», «Сольнае выканальніцтва» і «Траіста музыка» (дуда, скрыпка, барабан ці бубен).

Загадчык кафедры этналогіі і фальклору БДУКіМ Вячаслаў Калацэй адзначыў, што ў цэлым мерапрыемства пакінула вельмі добрае ўражанне. Можна спадзявацца на тое, што новы фальклорны конкурс паступова набярэ моц — усе ўмовы для гэтага ёсць.