Кожная з размалёвак мае значны пазнавальны і выхаваўчы патэнцыял. Размалёўка “Гродна” пазнаёміць дзетак з вялікімі і малымі славутасцямі горада, гістарычны абрыс якога захаваўся амаль нязменным да сённяшніх дзён.

З дапамогай гэтай размалёўкі можна зрабіць віртуальнае падарожжа па Гродне: наведаць Стары замак, знакамітую Барысаглебскую царкву ля берага Нёмана, пазнаёміцца з “Басяй і Касяй”, прайсціся па гістарычных вулачках і сучасных мясцінах горада, падзівіцца на скульптуры і проста шчыра пасмяяцца, бо мастак змясціў на размалёўцы шмат забаўных і запамінальных персанажаў.

Размалёўка “Гродзенская вобласць” распавядае пра славутасці прыроды, гісторыі, эканомікі гэтага рэгіёна ды і ўвогуле пра незвычайныя мясціны Гродзеншчыны, якія дзіцяці будзе цікава наведаць разам з бацькамі. Усё, што змешчана на размалёўцы: палацы і храмы, звяры і птушкі, вадаёмы і прамысловыя аб’екты, дзеці і дарослыя, – пададзена так, каб маленькаму мастаку было цікава і весела.

Размалёўкі будуць карыснымі для арганізацыі заняткаў па краязнаўстве ў дзіцячым садзе, групе падоўжанага дня, а таксама для сямейнага баўлення часу.