Полацкая зямля багатая на прыродныя крыніцы, якія жывяць шматлікія тут азёры. Але гэты край славіцца і сваімі духоўнымі крыніцамі — Сафійка, Еўфрасіння, Скарына, Усяслаў Чарадзей… Ганарыцца сваімі крыніцамі працоўнымі, культурнымі. Легендарная старажытнасць тут пераплецена, паяднана з не менш яскравай сучаснасцю.

Аўтар кнiгi — член Саюза пісьменнікаў Беларусі і Беларускага саюза журналістаў, заслужаны дзеяч культуры Рэспублікі Беларусь, паэт і празаік, кандыдат філасофскіх навук Зіновій Прыгодзіч. Ён бачыў розныя гарады і розных людзей. «Але вось Полаччына, дзе сівая даўніна паядналася з маладым запалам сучаснага горада-спадарожніка першай сталіцы Полацкага княства, па сутнасці  нашай прадзяржавы, запала ў сэрца».

Пра жыццё Полацкай зямлi,  яе гiсторыю, людзей,  дасягненнi распавядаюць былы мэр Наваполацка, а сёння кіраўнік Адміністрацыі Прэзідэнта Наталля Качанава, старшыня Полацкага райвыканкама, член Савета Рэспублікі Мікалай Шаўчук, вядомы беларускі археолаг, доктар гістарычных навук Дзяніс Дук, ветэран вайны, пісьменнік, ганаровы грамадзянін Полацка Алесь Савіцкі, намеснік генеральнага дырэктара ААТ «Нафтан» Сяргей Алтухоў, адзін з першых будаўнікоў гіганта нафтахіміі, ганаровы грамадзянін Наваполацка Пётр Саламуха, старшыня сельскагаспадарчага прадпрыемства «Кушлікі» Фёдар Завадскі і іншыя выдатныя людзі Полаччыны.