Уладзiмір Сцяпанавіч Лiпскі (нарадзіўся 6 мая 1940 г., у вёсачцы Шоўкавічы, што на Палессі, у Гомельскай вобласці, Рэчыцкім раёне) -  вядомы беларускi пісьменнік, старшыня праўлення Беларускага дзіцячага фонду, член Нацыянальнай камісіі па правах дзіцяці, лаўрэат Дзяржаўнай прэміі Беларусі, заслужаны дзеяч культуры Беларусі, заснавальнiк Усебеларускага фестывалю народнага гумару ў Аўцюках.
Уладзімір Сцяпанавіч Ліпскі 42 гады ўзначальваў дзіцячы часопіс "Вясёлка", цяпер з'яўляецца старшынёй рэдакцыйных калегій дзіцячых часопісаў "Вясёлка" і "Буся". Папулярнасць выданняў пацвярджаюць шматлікія падпісчыкі, настаўнікі, бібліятэкары, якія праводзяць па матэрыялах гэтых перыядычных выданняў заняткі і ўрокі.

Уладзімір Ліпскі выдаў шмат кніг, аповесцей, казак, нарысаў. У многіх калектыўных зборніках, школьных падручніках і чытанках змешчаны яго творы. Асобныя кніжкі выйшлі з друку ў Маскве, Вільнюсе, Кіеве, Кемераве, Ташкенце, Берліне.

Разам з папярэднIм дыректарам выдавецтва "Адукацыя i  выхаванне" Мiкалаем Супрановiчам заснаваў бiяграфiчную кнiжную серыю "Асобы".

У 2001 г. Уладзіміру Ліпскаму прысуджана Дзяржаўная прэмія Рэспублікі Беларусь, ў 2005 г. – прэмія Міжнароднай асацыяцыі дзіцячых фондаў, у 2007 г. – Ордэн “Францыска Скарыны” за нумарам 109.

У 2020 г. Расійскі дзіцячы фонд прысвоіў Уладзіміру Ліпскаму ганаровае званне «Рыцар Дзяцінства».

Любоў да жыцця, уменне даражыць кожным днём, сустракаць яго як свята Уладзімір Сцяпанавіч Ліпскі нясе праз гады.

“Што раблю? – Жыццё люблю!” – шчыра, з маладым запалам піша ён. І маладосць сапраўды з ім.

Прэзентацыя рамана У. Ліпскага «Цар» адбылася 9 снежня 2020 ў Дзяржаўным музеі гісторыі беларускай літаратуры.